爸爸的育兒方式　鄭丹瑞︰你是「喪偶式育兒」還是「詐屍式育兒」？

近日，一眾損友瘋傳以下這幾句說話：「如果你活着，就一直活着，如果你死了，就好好死着，別動不動詐屍，既嚇人，還添亂！」不明就裏的人如我，當然看得一頭霧水；在損友吹水大會上，終於由好事之徒揭盅：「你們無聽過在養兒育女的過程中，有人發明了『喪偶式育兒』呢個term咩？唔使我解釋啦，意思即係：生咗個BB出來之後，就好似死咗老公咁，因為成個湊仔過程，都係由做阿媽的負責，做老竇的就隱形如喪偶一樣。」

一眾損友聽完好事之徒解釋後，面面相覷，人人心中有鬼。好事之徒趾高氣揚，說道：「大家真係孤陋寡聞，連『喪偶式育兒』都未聽過，咁就一定唔知道甚麼叫『詐屍式育兒』啦？」好事之徒洋洋得意地滔滔不絕：「我都係在網上睇到何謂『詐屍式育兒』，原來係豬隊友的最高境界，死又沒死透，經常跳出來囉囉唆唆，讓人知道你的存在！」

好事之徒頓了頓，續說：「呢種做人老竇的特點就係：在行動上持續扮死，間歇性詐屍。即係等到做人阿媽的做到死下死下後，而做人老竇的又玩完手機、覆完電郵，就會開始行動，跟做人阿媽的唱反調；阿媽俾個仔食粒糖，佢話食糖壞牙，阿媽鬧仔，佢會皺埋眉頭，好認真咁同老婆講：教仔要有耐性！究竟你閣下係用『喪偶式育兒』定係『詐屍式育兒』？又抑或覺得兩種方法都好好用？自己知自己事啦！」這一次的吹水大會，在沉默中散會。

原文刊於《經濟日報》專欄「依然快樂」，原題為「育兒方式」。